آبنائے ہرمز میں امریکا ایران کشیدگی سے تیل کی قیمتیں چھ ہفتے کی بلند ترین سطح پر

پیر کے روز تیل کی قیمتیں تقریباً چھ ہفتے کی بلند ترین سطح پر پہنچ گئیں جب آبنائے ہرمز میں امریکا اور ایران کے درمیان جھڑپیں شدت اختیار کر گئیں، یہ وہ آبی گزرگاہ ہے جہاں سے امن کے زمانے میں دنیا کی تقریباً پانچویں حصے کے برابر تیل کی رسد گزرتی ہے۔ عالمی معیار قرار دیے جانے والے برینٹ کروڈ کے فیوچرز تقریباً 97 ڈالر فی بیرل تک بڑھ گئے جو گزشتہ پانچ روز میں 9 فیصد اور گزشتہ ایک ماہ میں 19 فیصد کا اضافہ ہے۔

اسی طرح امریکی ویسٹ ٹیکساس انٹرمیڈیٹ کروڈ 79 سینٹ کے اضافے کے ساتھ 92.27 ڈالر فی بیرل تک پہنچ گیا اور یہ بھی تقریباً چھ ہفتے کی بلند ترین سطح پر آ گیا کیونکہ مارکیٹوں نے طویل رسد میں خلل کے امکانات کو قیمتوں میں شامل کر لیا ہے۔

اس کشیدگی کے عالمی توانائی کی منڈیوں اور امریکی گھرانوں پر براہ راست اثرات مرتب ہو رہے ہیں۔ خام تیل کی بڑھتی ہوئی قیمتیں پہلے ہی پمپ پر زیادہ اخراجات کی صورت میں منتقل ہو رہی ہیں جب کہ یہ تنازع دنیا کی انتہائی اہم ترین بحری گزرگاہوں میں سے ایک پر آمدورفت میں خلل ڈال رہا ہے۔ یہ معاشی دباؤ وسط مدتی انتخابات سے قبل امریکی ووٹرز کے لیے ایک مرکزی مسئلہ بن کر ابھر رہا ہے۔