حملوں اور ہلاکتوں کی تصدیق
حوثیوں کے فوجی ترجمان یحییٰ سریع کے مطابق حوثیوں نے جمعرات کی شام شاہ خالد بین الاقوامی ایئرپورٹ پر دو کروز میزائل داغے۔ حوثی افواج نے ابھا ایئرپورٹ اور شاہ خالد فضائی اڈے پر بھی بیلسٹک میزائل حملے کیے۔
سریع نے ان حملوں کو "عین نشانے پر اور براہ راست" قرار دیتے ہوئے کہا کہ ان کے نتیجے میں دونوں ایئرپورٹس پر فضائی ٹریفک میں خلل پیدا ہوا اور تنصیبات اور فضائی اڈے کو نقصان پہنچا۔ تاہم سعودی حکومت نے ان حملوں کو تسلیم نہیں کیا۔ یمن میں حوثیوں کے خلاف سعودی فوجی اتحاد کے سربراہ ترکی المالکی نے دعویٰ کیا کہ ریاض پہنچنے سے قبل دو میزائلوں کو مار گرایا گیا جبکہ ایک میزائل شاہ خالد فضائی اڈے تک پہنچنے سے پہلے تباہ کر دیا گیا۔
جمعرات کو ریاض آنے اور جانے والی تقریباً چالیس فیصد پروازیں منسوخ کر دی گئیں، جبکہ ایئر انڈیا اور لفتھانزا نے اعلان کیا کہ وہ اگلے ہفتے تک سعودی دارالحکومت کے لیے پروازیں نہیں چلائیں گی۔
